וואשינגטאן – דער רעפובליקאנער סענאט פירער מיטש מעקאנעל האט זיך נעכטן אראפגעזעצט מיט פרעזידענט טראמפ אין ווייסן הויז, אין א פארזוך אויסצוגלייכן זייערע דיפערענצן און שטעלן א וויזיע פאר די קומענדיגע מאנאטן. מעקאנעל און טראמפ זענען געווען אין א שטיקל קאלטע קריג אין די לעצטע פאר מאנאטן, נאכדעם וואס טראמפ האט באשולדיגט מעקאנעל אינעם דורכפאל פון די סענאט רעפובליקאנער דורכצופירן א ביל אפצושאפן אבאמאקעיר, און טראמפ האט אפילו געלאזט פאלן ווערטער אז ער האלט אז מעקאנעל דארף ארויסגעווארפן ווערן פון זיין פירערשאפט פאזיציע. למעשה זענען די צוויי געזעסן נעכטן פאר א לענגערן שמועס אין ווייסן הויז, און נאכדעם האבן זיי אפגעהאלטן א געמיינזאמע פרעסע קאנפערענץ, וואו טראמפ האט געזאגט אז זייער פריינטשאפט איז גאר שטארק און זיי האבן אינאיינעם פארשפראכן אויפצוטאן גרויסע זאכן אויפ'ן פראנט פון שטייער רעפארם און אבאמאקעיר.
הוסף רשומת תגובה