די פינישע רעגירונג האָט מיט עטליכע וואָכן צוריק אָנגעהויבן אַ גאָר אינטרעסאַנט פראָגראַם, וועלכע אויב זי אַרבעט זיך אויס קען עס טוישן די וועג וויאַזוי רעגירונגען טיילן אויס הילף פאַר אירע בירגער. נעמליך, אַנשטאָט פאַרשידענע הילפס-פראָגראַמען פאַר אַרבייטסלאָזע און אָרימע, טוט די רעגירונג געבן אַ געהאַלט אין קעש, וועלכע באַטרעפט אַזוי ווי מינימום וועידש, און די וועלכע נעמען, דאַרפן נישט אַריבערגיין קיין שום ביוראָקראַטישע פראָצעדורן אָדער פאַרהערן, און קענען טון מיט די געלט וואָס עס גלוסט זיי.
די געדאַנק אונטער די פראָבע איז אַז מענטשן ווייסן בעסער וויאַזוי צו נוצן זייער געלט ווי די רעגירונג. און אַז דורך געבן געלט, וועלן די מענטשן ענדערש זיך שטעלן אויף די פוס, און זוכן אַרבייט אָן דעם וואָס די רעגירונג זאָל זיי דאַרפן צווינגען דערצו. אַזוי אויך איז דאָס גוט פאַר די עקאָנאָמיע, און עקספערטן האַלטן אַז נאָכדעם וואָס די מענטשן באַקומען די מינימום וועידש, טוט עס זיי אויטאָמאַטיש מאָטיווירן צו זוכן אַרבעט.
די פינישע רעגירונג האָט היינט אַרויסגעגעבן אַ טיילווייזע באַריכט איבער די פראָגראַם, און עס צייגט אַז די רעזולטאַטן זענען דערווייל גאָר גוט. פולע פון די וועלכע באַקומען די פראָגראַם, זוכן שוין אַרבעטספּלעצער נאָכדעם וואָס זיי האָבן זיך אַביסל געשטעלט אויף די פוס. אַזוי אויך האָט עס געצייגט אַ פאַרבעסערונג אין גייסטישע געזונט פון פולע וועלכע האָבן ביז יעצט געדאַרפט אָנקומען צו גייסטישע הילף.
אַ ענליכע פראָגראַם ווערט אויספרובירט אין האָלאַנד, און די לאָקאַלע רעגירונג אין אַנטאַריא קאַנאַדע האָט אויך געמאָלדן אַז זיי וועלן איינפירן אַזאַ פראָגראַם, וואָס טוט סיי העלפן מער די ארימעלייט, און שפאָרט איין פאַר די רעגירונג פולע ביוראָקראַטישע אויסגאַבן.
הוסף רשומת תגובה