95-יעריגער נאצי דעפארטירט פון ניו יארק [בילדער און ווידיאס]

די לעצטע באוואוסטע נאצי מיטאַרבעטער וואס וואוינט אין אמעריקע, א פינף און ניינציג יעהריגער לאגער וועכטער וואס האט געשפילט א וויכטיגע ראלע אין די מארד פון טויזנטער אידן הי"ד, איז היינט פארטאגס דעפארטירט געווארן קיין דייטשלאנד פון זיין ניו יארק היים, אויספירנדיג וואס די אמעריקאנער אַמבאַסאַדאָר צו דייטשלאנד האט אנגערופן א "שווערע אויפגאבע".

ריטשארד גרענעל, דער אמעריקאנער אַמבאַסאַדאָר וואס איז אנגעקומען קיין דייטשלאנד אנפאנג 2018 נאכדעם וואס א פאליטישע שפיל דורך די דעמאקראטן האט אויפגעהאלטן זיין באשטעטיגונג פון אדורכגיין אין די סענאט פאר לאנגע מאנאטן, האט געזאגט אין א אינטערוויו מיט פאקס ניוז, אז טראמפ - אליינס א ניו יארקער - האט אים באפוילן צו מאכן די דזשאקי פאליג (Jakiw Palij) ימ"ש דעפארטאציע א פריאריטעט.

"אייס", דער "אימיגראציע און קאסטומס ענפארסמענט" אגענטור וועלכע אינפארסירט אימיגראציע געזעצן אין לאנד, האט היינט אויסגעפירט די פרעזידענט'ס באפעל, אבער עס איז נישט געקומען גרינג. די דעפארטאציע קומט ענדליך נאך א לאנגע פארצויגענע דיפלאמאטישע פארהאנדלונג, און איז געווען קאמפליצירט, צוליב די פאקט אז פאליג איז נישט קיין דייטשע בירגער, און איז געבליבן א מענטשן אהן קיין לאנד נאכדעם וואס אמעריקע האט צוגענומען זיין בירגערשאפט אין 2003 (זעה דאקומענט אונטן).

די אמעריקע טענה צו דייטשלאנד איז נישט געווען א לעגאלע, נאר א מאראלישע, זינט ער האט געדינט די געוועזענע דייטשע רעגירונג, האט גרענעל ערקלערט.

דזשאקי פאליג האט זיך מודה געווען אין 2003 אז ער האט געדינט אין די טראוקיני קאָנצענטראַציע קעמפ אין די דייטשע-אקופירטע פוילן, ווי ער האט געהאט א "אומערזעצבארע ראלע" אין די מארד פון בערך זעקס טויזנט אידן הי"ד. ווען ער איז אריינגעקומען אין לאנד, האט ער געהאט דערקלערט אז ער האט געארבעט אין א פאַרם במשך די וועלט קריג.

זעה בילדער, ווידיאס און דאקומענטן